Home / سرائیکی شاعری / امان اللہ ارشد / ولہیٹ اپنڑیں گناہیں ساریں دا بار

ولہیٹ اپنڑیں گناہیں ساریں دا بار

غزل

ولہیٹ اپنڑیں گناہیں ساریں دا بار مونڈھے تے چائی ودے ہیں

اونویں تاں ڈیکھنڑ کیتے اے کالی لکار مونڈھے تے چائی ودے ہیں

 

کتھاؤں اڑ کے جو کھڑ گیا ہے قمیض دے وچ کرینہہ دا پھل

ایویں نظردے جو سارے تھل دی بہار مونڈھے تے چائی ودے ہیں

 

کتھائیں مہندی کتھائیں کجلا کتھائیں کنگھی کتھائیں شیشہ

تیکوں_ملنڑ کیتے ڈیکھ سارا بازار مونڈھے تے چائی ودے ہیں

 

اتھاں وی تاں کوئی من منوتی_اتھاں وی تاں کوئی بال ڈیوا

اساں جو یادیں دے اتنے سارے مزار مونڈھے تے چائی ودے ہیں

 

توں لا تے تہمت نویں اساں تے اساڈا ڈس کیا وگاڑ گھنسیں

ایہو جھئیں الزام جندڑی جیوی ہزار مونڈھے تے چائی ودے ہیں

 

سئیں امان اللہ ارشد

Check Also

ساڈی وسوں دا ہک سَچا تے سُچا سرائیکی نینگر | مخمور قلندری دی قلم توں

سلیوٹ معوز ارائیں ساڈی وسوں دا او سچا تے سُچا سرائیکی ہے جئیں ظہور دمانی …

جواب دیں

آپ کا ای میل ایڈریس شائع نہیں کیا جائے گا۔