Home / سرائیکی / رُٹھی روح دی ضِد ہئی | شاکر مہروی

رُٹھی روح دی ضِد ہئی | شاکر مہروی

نظم

رُٹھی روح دی ضِد ہئی اساں من گئے ہیں

نسے سوچا دل دا تیں لانونڑ دا فائدہ

ترٹے شیشے وانگوں بدن چور تھی گئے

ایہو ملئے روح کوں رہانونڑ دا فائدہ

جیڑا ہاں تیں بار ہے کہیں جاہ لہیجے

جتھاں کوئی نہ ہووے اُتھاں ونج روویجے

بہیں گھت کیں اپنڑیاں کلہیپے دے گل اِچ

روویجے پِٹیجے تیں ماتم کریجے

سینو کڈھ کیں دِل کوں عذابیں سٹیجے

ولا روح ہے اہدا کہ اِتنا کھِلیجے

روویجے کھِلیجے ،کھِلیجے کھِلیجے

ولا کھِلدیں کھِلدیں اے دِل کوں اکھیجے

چا گل نام چاتی کیڑا سہرا پاتی

ڈَسا ہاں یاری نِبھانونڑ دا فائدہ

رُٹھی روح دی ضِد ہئی اساں من گئے ہیں

نسے سوچا دل دا تیں لانونڑ دا فائدہ۔۔۔

بیا حال اے ہے ہوا نال شر اے

ساری رات در تیں مریندی جھُمر اے

ہُنڑیں در جو کھڑکیے متاں کوئی ہووے

ساڈی آند ویند ہے چکر تیں چکر اے

ساڈے سِکدے روح ہِن ساکوں تانگ کہیندی

ایکوں کھیڈکیتے لدھا ساڈا در اے

کوئی ایکوں آکھے او کرمیں دی ماری

توں جمدی مسافر تیڈا کم سفر ہے

ہکی جاہ تیں کھڑ گئیں کیڑی ضِد تیں اڑ گئیں

ایویں کہیں کوں تھُڈے ڈیوانونڑ دا فائدہ

رُٹھی روح دی ضِد ہئی اساں من گئے ہیں

نسے سوچا دل دا تیں لانونڑ دا فائدہ۔

ملیے کل سجنڑ سوچے ہر گالھ آکھاں

ایویں ہوندے کوئی کہیں دا بھیوال آکھاں

اِتھاں میں رُلی ہاں تیڈی تانگھ وِچ

اُتھاں رُل گئے تیڈا مال آکھاں

اے پل پل گزارین میں کیویں ڈساواں

میں کیویں گزارین سجنڑ سال آکھاں

لکھاں گالہیں اٹکیں ایویں چیتا چکریے

او بئی گالھ آکھاں اے بئی گالھ آکھاں

جڈاں تھُوڈ جوڑیم میکوں یاد آگئے

منیدی جو نئی ڈسانونڑ دا فائدہ

رُٹھی روح دی ضِد ہئی اساں من گئے ہیں

نسے سوچا دل دا تیں لانونڑ دا فائدہ

شاکر مہروی

Check Also

ساڈی وسوں دا ہک سَچا تے سُچا سرائیکی نینگر | مخمور قلندری دی قلم توں

سلیوٹ معوز ارائیں ساڈی وسوں دا او سچا تے سُچا سرائیکی ہے جئیں ظہور دمانی …

جواب دیں

آپ کا ای میل ایڈریس شائع نہیں کیا جائے گا۔