Home / سرائیکی / شعیب انجم سئیں دے سرائیکی ڈوہڑے

شعیب انجم سئیں دے سرائیکی ڈوہڑے

ڈوہڑے

 

میڈے دل مجبور توں پچھ تاں سہی میکوں کیڈا پیارا لگدا ایں

دیدار دی سک اچ رل موئیاں اکھیاں دا تارا لگدا ایں

جہنوں ویکھ طبیعت ٹھر ویندی او خاص نظارا لگدا ایں

بے رنگ انجم نوں زندگی دا توں سجنڑ کنارا لگدا ایں۔

 

 

توں قدر نہ کر تیری مرضی اے ساڈا تئیں تے زور تاں کوئی نہیں

دلوں تیرے نال عقیدت ہے ساڈے دل وچ چور تاں کوئی نہیں

ودا بے شک انجم مرضیاں کر ساڈا جگ تے ہور تاں کوئی نہیں

تیری ذات سوا کئیں بشر اتے اساں کرنا غور تاں کوئی نہیں

 

 

سوہنڑاں پاکستان دا ہر اک شہر اے پر ضلع خوشاب دی شان الگ

ایندے دیسی گھیو دے ڈھوڈھے دی پوری دنیا وِچ پچان الگ

ایندا جگ توں وکھراۓ سون سکیسر، نالے تھل دا ریگستان الگ

ایندی انجم کیا تعریف کراں اتھے وسدا  اے ہر انسان الگ

 

 

او جڈنڑ وی ملدِن ڈُکھیاں تے نواں ستم ایجاد کریندن

میڈے جگر دے نازک زخماں نوں چا وت آباد کریندن

میڈی ڈکھاں وچ رل گئی زندگی نوں اڈو ہور ناشاد کریندن

اساں جہدی پئی انجم بھلائی سوچی اوہنے نت برباد کریندن

 

سجنڑاں توں نکھڑ کے کے دسیئے کیویں نبھدن ڈنگ پردیس اچ

ساہ ساہ اودر دی سولی تے ہو ویندا اے تنگ پردیس اچ

چووی گھنٹے ہنج تے پلکاں دی چھڑی راہندی اے جنگ پردیس اچ

اوداں انجم جان نکلدی اے جدوں یاد آون سنگ پردیس اچ

 

شعیب انجم

Check Also

Image For Jamshid Nashad

ہتهیں تے چاکے گهن ونجے یاپیریں پاکے گهن ونجے | جمشید ناشاد

ہتهیں تے چاکے گهن ونجے یاپیریں پاکے گهن ونجے اساں تاں ککه ہسے ہوا جتهاں …

جواب دیں

آپ کا ای میل ایڈریس شائع نہیں کیا جائے گا۔