Home / سرائیکی شاعری / احمد خان طارق / احمد خان طارق نظم شہید کربلا | قربانی

احمد خان طارق نظم شہید کربلا | قربانی

 نظم

ہمشیر کوں ویر اپیل کیتی اج رات اسلام تیں آ گئی اے
ایں گال تے محض مخالف تھی اے وطن دی آب ہوا گئی اے

کر جلد تیاری سفراں دی سر کفن سجا تے ٹر جلنڑے
جل روضے پاک تے منگ دعا گل لا مکلا تے ٹر جلنڑے
ول جندرے مار تے ہر گھر دے اج طاق ولا تے ٹر جلنڑے

سنڑ باک نکل گئی صغریٰ دی یک لخت خاموشی چھا گئی اے
ہمشیر کوں ویر اپیل کیتی اج رات اسلام تیں آ گئی اے

ہمشیر الانڑی ویر میڈا میڈے تن وچ جے تئیں ساہ ھوسی
اسلام دے ہر ڈکھ درد کیتے میڈی جھولی دے وچ جاہ ھوسی
ایڈو میڈی چاک ردا ہوسی اوڈو تیڈی مقتل گاہ ھوسی
اسلام کوں ایں رنگ لا ڈیساں خود آپ گواہ ھوسی

ہر بھینڑ بھرا کوں آکھ بہسی کئی بھینڑ ویران وسا گئی اے
ہمشیر کوں ویر اپیل کیتی اج رات اسلام تیں آ گئی اے

پردیس تیاری دیغر کوں لجپال علی دے جئے کیتی
ایہا رات اجوکی ٹک پوسیں اِتھ کہیں نہ حق ہمسۓ کیتی
ہر منزل موڑ تے بارش وچ شاہ مہلک منزل طئے کیتی
ڈکھ درد سواۓ ھن سر توڑے پر اف نہ بخت سواۓ کیتی

اے منشاء ہئی تقدیر دی جو شبیر دی منشاء گئی اے
ہمشیر کوں ویر اپیل کیتی اج رات اسلام تیں آ گئی اے

چم آکھیا بی بی اکبر کوں میڈی اکبر لاج رکھا چھوڑیں
ہر آندے تیر کوں بوسہ ڈے چھک نال سینے دے لا چھوڑیں
میں اوپری کف دی بانھی ہاں میڈی ذات صفات بچا چھوڑیں
بچے کجھ نہ توڑے گھر میڈے اسلام دا نام بچا چھوڑیں

سادات آکھے اسلام اُتوں کئی بانھی ویل وتا گئی اے
ہمشیر کوں ویر اپیل کیتی اج رات اسلام تیں آ گئی اے

تقدیر دے سنگ شبیر دا جاں ڈے گھن تے ونج وپار تھیا
ہمشیر دے سامنڑے ویر دے تن سو تیر لگا لگ پار تھیا
ایں رات دا رنگ تھی سرخ گیا ہر علم نشاں رنگ دار تھیا
ہر مرسل اکھیاں نوٹیاں چا جاں ظلم دا گرم بزار تھیا

رنگ فرش دا ڈیکھ تے فلک اُتیں تھی ملک دی ہوش ہوا گئی اے
ہمشیر کوں ویر اپیل کیتی اج رات اسلام تیں آ گئی اے

پلوا کے پانڑی اصغر کوں شاہ خیمے تیں گھن آیا ہے
پڑھ پڑھ کے بی بی بسم اللہ معصوم ہتھاں تے چایا ہے
ہر زخم معصوم دا چم چم کے گل نال چا گل دے لایا ہے
ول خشک لباں دو تک تک تے بی بی مونہہ اے فرمایا ہے

ہے گال اُوھا منظور میکوں جو بےپرواہ کوں بھا گئی اے
ہمشیر کوں ویر اپیل کیتی اج رات اسلام تیں آ گئی اے

احمد خان طارق 

Check Also

پھل مکھی دا سجھ دے مونہہ دو  ڈیہدا راہندائے | ظفر اقبال عدم

سرائیکی نظم پھل مکھی دا سجھ دے مونہہ دو ڈیہدا راہندائے ایویں لکدائے سجھ کوں …

جواب دیں

آپ کا ای میل ایڈریس شائع نہیں کیا جائے گا۔