Home / Uncategorized / پولیں دی وستی دا ہک سبق آموز قصہ | ذیش قیصرانی

پولیں دی وستی دا ہک سبق آموز قصہ | ذیش قیصرانی

پولیں دی وستی وچ ہک پولی دے گھر دی چھت ڈیہہ پئی ہئی تے سارے پولی کٹھے تھی گئین ۔ ہر کہیں اپنڑیں اپنڑی جھگ ماری ہے۔ کہیں گھر آلیں دی عیادت چھت دی تعزیت کیتی ہے تے کہیں ایں دوران کئی درکھانڑیں مستریں کوں وی لعن تعن کیتا ۔ رولا ودھدا ودھدا تمن دار تک پہنچ گیا تمن دار خود آ گیا اور عیادت تے تعزیعت دے بعد تعاون دا یقین ڈیوایا ۔ اتھائیں سیانڑا پولی بولیے جو مرو کڑی گولو جیڑھی دی وجہ توں چھت ڈٹھی ہے تاکہ ولا اونجھی کڑی چھتیں وچ نہ پاوں بئے نقصان نہ تھیون ۔ کئی کڑیاں گولیاں گیاں جیڑیاں کمزور ہن یا کمزور لگدیاں ہن۔ ہنڑ گالھ آ گئی ہے جو پتہ کیویں لگسی کیڑھی کڑی ہئی ۔ ہک بزرگ آکھیے سوراخی سڈو او ڈسیسی او کوئی سوراخ گول ڈیسی کوئی نہ کوئی لبھسی ضرور ۔ سوراخی آیا اپنڑے چادر کپڑے نال چا تے تیار شیار تھی کیں ۔ پوری وستی وچ شور شرابا ہئی جو کڑی گولی ویندی پئی ہے۔ سوراخی آیا بیٹھے سوراخ لبھدا پئے۔
تمن دار دا حکم ہئی سوراخی ڈو ڈینہہ دے اندر اندر سوراخ لبھسی۔ سوراخی وڈی کوشش نال کئی کڑیں دی پڑتال توں بعد ہک ترٹی کڑی پیش کیتی اور آکھیا کہ اے کڑی ہے جیندی وجہ توں چھت ڈٹھی ہے۔ سوراخی دے سوراخ توں بعد علاقے وچ شور شرابا تھی گیا جو پہلے جمعے ۔ تگے ۔ نکے۔ شادے دے کوٹھیں دیاں چھتوں جو ڈٹھیا ہن اونہیں دا سوراخ وی گولیا ونجے ۔ سوراخی اے گالھ سنڑ کے اوکھا تھی گیا جو ہنڑ او نہ گول ڈیساں تاں تمن دار بھڑسی گولاں تے گولاں کیویں ۔ سوراخی جان دی امان پانونڑ کیتے آکھ ڈتا کہ پہلے وی اینہیں کاٹھی دیاں کڑیاں ہن ۔ او چھتاں وی تہوں ڈٹھیاں ہن۔
اے گالھ سنڑ تے ہر کہیں آکھیا ایں کاٹھی کوں بل بنڑاو اگوتے چھتیں دیاں کڑیاں ایں کاٹھی نال نہ بنڑیسوں ۔

ذیش قیصرانی

Check Also

Pics For Jamshid Nashad

جمشیدناشاد دی کتاب پرلی کندھی وچوں ہک سوہنڑی غزل

پپلئیں دی نازک شاخ توں ہنجوواں دے پھل ڈھہندے ریہے اسمان توں ڈھہہ ڈھہہ کرئیں …