Home / سرائیکی افسانے / کُندن دی بہوں چھوٹی عمر اچ شادی تھی گئی ہئ| سرائیکی افسانہ | شہباز مہتر

کُندن دی بہوں چھوٹی عمر اچ شادی تھی گئی ہئ| سرائیکی افسانہ | شہباز مہتر

کُندن دی بہوں چھوٹی عمر اچ شادی تھی گئی ہئی تے ہنڑ اوندے پئے کو موئیں ہوئیں 6 سال تھی گن ،ہنڑ کندن دی عمر تقریبًا پینتری سال ہے، کندن وڈے پتر اسلم کوں رات دی روٹی دیندیں ہوئیں آکھدی اے اج رات پانڑی دے وارے تے کلہا نا ونجیں، نکے بھرا حسن کوں وی نال گدھی ونجیں حسن سنڑ تے آکھیے ادا اسلم میں ہنڑ سمہدا پیاں میکوں اٹھا گھنی ۔
جیہں ویلہے ونجیں اسلم روٹی کھا تے باہر سگریٹ پیونڑ ویندا پیا ہا جیویں حویلی دا دروازہ کھولیس دروازے دا ہک پھڑکا تلیں ڈہہ پے اسلم حسن کو آکھیے یار تئیں اج والا دروازہ کائنی بنڑوایا تیکوں روز ہک کم آہداں تے توں روز کائنی کریندا حسن آکھیے ادا کل ضرور سڈ امساں چاچے درکھان کوں تے بنڑوا گھنساں
اسلم باہر سگریٹ لا تے اپڑیں دوست ساجد کوں فون کیتے جو اج رات تیار تھیویں میڈا پانڑیں دا وارا اے آپاں اج ولا رضیہ تے نسیمہ کون ملنڑ جُلسوں تے توں ایویں کر جو نسیمہ کوں فون کر تے آکھ ڈے جو اج رات ڈو وجے تیار تھی ونجے تے اپڑیں بھینڑ رضیہ کوں آکھے جو اسلم وی امسے تے اونکوں وی آکھ ڈیویں ۔ رضیہ ہونڑیں ڈو بھینڑیں ہِن تے اونہاں دا ہک بھرا ہے ۔ پیو سعودیہ ہوندے تے ما اندھی اے ساجد آکھیے ٹھیک اے میں فون کر تے آکھ ڈینداں حسن بسترے دے اندر اپڑیں یار امجد کوں میسج کیتے جو اج رات پانڑیں دا وارا اے توں وی آ ونجیں کل چھٹی وی ہے تے آپاں پکا سگریٹ وی پیں گھنسوں ادے اسلم کنوں لُک تے امجد آکھیے ٹھیک اے میں تے ظفر کھٹے آ ویسوں ہک وجے تیڈی زمین تے حسن آکھیے نا نا یار ظفر کوں نا گھن تے آویں او آپاں کنوں ڈھگ وڈا اے تے میکوں اوندے سامہیں سگریٹ پیوینڑ عجیب لگدے میں اوندے لحاظ کرینداں تے عزت وی کرینداں امجد آکھیے یار او وی پکا سگریٹ پیندے تے میڈے کول چرس وی کائنی اج پر ظفر کنے ہے پئی اج او آپاں کوں پلیسی حسن آکھیے چلو ٹھیک اے ۔
رات دے ہک وجے اسلم، حسن کوں اٹھائے جو ونج ڈو کیہیاں چا وا بھانڑیں دے وچ ہوسن حسن بھانڑیں وچوں کیہیاں چا تے ما کو آکھیس اماں اساں دروازے دی کُنڈی باہروں لاتی ویندوں تاکہ اساڈی واپسی تے تیکوں نا اٹھڑاں پووے ڈوہیں بھرا نکل پن تے رستے وچ ای حسن، امجد کوں فون کر تے اٹھا گدھے تے آکھیس جو تساں آ ونجو تے میڈی زمین تے لُک بہو میں تہاکوں میسج کر تے سڈ گھنساں
جینہ ویلہے ادا اسلم پاسے تے ہوسی موگے تے پج تے اسلم پانڑیں لوڑھیے تے حسن کوں آکھیس توں اتھائیں بہہ میں زمین کوں ونج ڈہداں حسن امجد کوں میسج کریندییں ہوئیں اسلم کو جواب ڈتے جو ٹھیک اے ادا توں ونج امجد تے ظفر پج تے سگریٹ بڑاونڑ پئے گئین اسلم زمین تک پانڑیں کوں ڈیکھ تے ساجد کوں فون کیتیس جو یار آ ونج آپاں جلوں پانڑیں لگا کھڑے ساجد آکھیے توں روڈ تے آونج میں آیا کھڑا اسلم تے ساجد موٹر سائیکل تے رضیہ تے نسیمہ دے گھر دو لگے گئے ایڈوں ظفر آکھیے یار باقی سگریٹ تساں پیوو میں تھوڑا ہلکا تھی آواں ظفر کماد اچ وڑ گے ،تے حسن تے امجد سگریٹ پیونڑ پئے گن ڈھیر دیر گزرنڑ دے بعد حسن امجد کوں آکھیے جو یار ظفر نی ولیا کیڈے گئے خیر تاں ہس امجد آکھیے توں چھوڑ او دیر نال ولسی اوں اج کہینکوں ملڑاں ہا توں اے سوچ جو آپاں کوں ایجھا موقع ولا کائنا ملسی اج کلہے وی ہوں تے مست ماحول وی ہے حسن آکھیے نا نا ادا اسلم کہیں ویلہے وی آ سگدے میکوں ڈر لگدے امجد آکھیے آپاں اوں سامنڑے آلے کماد اچ جُلدوں پئے اگر اسلم آ گیا تاں توں باہر آ تے آکھیں جو ہلکا تھینونڑ گیا ہم تے اسلم کوں میڈا پتا وی کائنا لگسے
خیر حسن کوں کوئ خطرہ محسوس نی تھیا تے او تیار تھی گے اسلم رضیہ کنوں پُچھیے جو تہاڈا لاڈلا بھرا کتھاں ایں نظر نی پیا امدا رضیہ آکھیے پتا کائنی کافی دیر دا ظفر نال گے کتھائیں ۔ ظفر اپڑیں جاہ تے پُج تے جیویں باہروں دروازہ کھولیے دروازہ دھڑم تلیں۔

لکھت : شہباز مہتر رحیم یار خان:

 

شہباز مہتر نال رابطہ کرنڑ کیتے کلک کرو 

Check Also

میکوں یاد ہے ساڈیاں سالھیں دے پِچھاڑے کِنوں تحریر سئیں باسط بھٹی

میکوں یاد ہے ساڈیاں سالھیں دے پِچھاڑے کِنوں ہک باغ ہا۔ وَٹ وٹ نال گھاٹیاں …